先唔解釋點解兜完歐亞洲一圈，返到嚟南半球仍然仲住喺酒店...又再努力揾緊屋租。
終於明白阿媽阿婆對主婦手係點樣得嚟，細個一有啲咩𠵱郁，阿婆就叉起條腰：「你哋啲屎片尿片全部都係我親手洗，哼，你仲咁曳咁唔聽話！」
返咗嚟一個月，酒店就用呢部被解剖咗一半但永遠都未整好，因為師傅話冇架生.冇時間.冇配件.冇呢樣嗰樣...而仍然天一半地一半嘅阿公洗衣機嚟歡迎我同意佬回歸🙄
馬屎落地行，洗衣機屎咗，咁點樣算？
諗住拎去舖頭磅洗，嗚啊！舖頭姐姐話無論你攞一大籮衫或一隻船襪，統一價一機衫盛惠400坡索即港幣90元。朋友，乾衣又另外計400噃（唔知香港仲係咪磅洗$30/磅連乾衣？）
可見何謂貧富懸殊喇，周街都係乞衣，竟然洗機衫都係何等貴族先俾得起嘅玩意。
我哋兩丁友·流浪漢·邊有咁多衫儲到一機咁多？慳返啖氣返去做洗衫婆罷了。反正第日七老八十時，我都可叉起條腰同意佬講：「喺阿根廷時你啲底面衫褲牛仔褲都係我親手洗，你仲唔快啲俾家用！」
手洗衫唔難，扭乾嗰吓先攞命。我日日扭扭扭，好恐怖喔！手指啲橫紋出哂嚟！
天啊，我要求好簡單，有部識郁嘅洗衣機啫，仲要等多幾多個月？！
#師奶哲理
#洗衫婆的願望
#阿根廷實況報導
Search